کراچی میں منگل کے روز ہونے والی شدید بارش اور شہر کی ابتر صورتحال کے بعد سوشل میڈیا پر محکمہ تعلیم کے نام سے ایک نوٹیفکیشن تیزی سے پھیل گیا۔
اس وائرل پیغام میں دعویٰ کیا گیا تھا کہ محکمہ تعلیم سندھ نے کراچی سمیت پورے صوبے میں اسکولوں کو ایک ہفتے کے لیے بند کرنے کا اعلان کردیا ہے، جبکہ بعض پوسٹس میں بدھ، جمعرات اور جمعے کی تعطیلات کا ذکر کیا گیا۔
سوشل میڈیا پر چلنے والا اس طرح کا نوٹیفکیشن فیک اور گمراہ کن معلومات پر مبنی ہے، محکمہ اسکول ایجوکیشن سندھ نے اسکولز کی تعطیلات کے حوالے سے کوئی بھی نوٹیفیکیشن جاری نہیں کیا۔ pic.twitter.com/jfmChNqXgk
— Minister Education & Literacy Government of Sindh (@MinisterEduGos) August 20, 2025
فیکٹ پلس کی ٹیم نے تحقیق کی تو معلوم ہوا کہ یہ نوٹیفکیشن جعلی ہے اور اس میں دی گئی معلومات بالکل درست نہیں۔
فیکٹ پلس کے مطابق محکمہ اسکول ایجوکیشن سندھ نے وضاحت کی ہے کہ اسکولوں کی تعطیلات کے حوالے سے کوئی ایسا نوٹیفکیشن جاری نہیں کیا گیا۔
اصل صورتحال یہ ہے کہ منگل کی بارشوں کے بعد بدھ کے دن کے لیے چھٹی کا اعلان کیا گیا تھا، جب کہ موسم کی شدت کو دیکھتے ہوئے جمعرات کے دن کے لیے علیحدہ نوٹیفکیشن جاری کیا گیا، جس میں صرف ایک دن کی تعطیل کا فیصلہ شامل تھا۔ تاہم یہ فیصلہ بھی صرف کراچی ڈویژن کی حد تک تھا۔
📢
بارشوں کے پیش نظر کل بروز جمعرات کراچی ڈویژن کے تمام سرکاری و نجی اسکولز اور کالیجز بند رہیں گے۔ محکمہ اسکول ایجوکیشن سندھ نے نوٹیفکیشن جاری کردیا ۔ https://t.co/XcgT64GWGa pic.twitter.com/iicXuUkqz4— Minister Education & Literacy Government of Sindh (@MinisterEduGos) August 20, 2025
اس طرح سوشل میڈیا پر گردش کرنے والا ایک ہفتے کی چھٹی کا نوٹیفکیشن مکمل طور پر جھوٹا اور گمراہ کن ثابت ہوا ہے۔
نتائج:۔ کراچی سمیت سندھ بھر کے اسکولوں میں ایک ہفتے کی تعطیلات کا نوٹیفکیشن جعلی ہے۔
