سوشل میڈیا پر ایک مبینہ نوٹیفکیشن گردش کررہا ہے جس میں دعویٰ کیا گیا ہے کہ ہائیر ایجوکیشن کمیشن (ایچ ای سی)نے تین سالہ ڈپلومہ آف ایسوسی ایٹ انجینیئرنگ (ڈی اے ای) کو 14 سالہ تعلیم یا بیچلر ڈگری کے مساوی قرار دے دیا ہے۔ اور اس بنیاد پر ’ڈی اے ای‘ کے حامل طلبہ براہِ راست ماسٹرز پروگرامز میں داخلہ حاصل کر سکتے ہیں۔
یہ مبینہ نوٹیفکیشن 23 جولائی کی تاریخ کے ساتھ فیس بک اور دیگر پلیٹ فارمز پر وائرل ہوا، جس میں یہ ظاہر کیا گیا کہ ایچ ای سی نے تمام ایکریڈیٹیشن اور تصدیق کرنے والے اداروں کو ہدایات جاری کی ہیں کہ ’ڈی اے ای‘ کو تعلیمی ترقی، ملازمت اور مقابلے کے امتحانات کے لیے 14 سالہ تعلیم کے مساوی تصور کیا جائے۔
نوٹیفکیشن میں یہاں تک دعویٰ کیا گیا کہ یہ تبدیلی انجینیئرنگ ٹیکنالوجی، اپلائیڈ سائنسز اور ٹیکنیکل مینجمنٹ جیسے شعبوں کے بی ایس، بی ایس سی پروگرامز میں داخلے کے لیے بھی مؤثر ہوگی۔
فیکٹ پلس نے اس حوالے سے تحقیق کی اور حقائق جاننے کی کوشش کی تو معلوم ہوا کہ یہ نوٹیفکشن جعلی ہے، ایچ ای سی نے ایسا کوئی نوٹیفکیشن جاری نہیں کیا نہ ایسی کوئی ہدایات جاری کی ہیں۔
ایچ ای سی کے ترجمان طارق اقبال نے ایک پیغام میں بتایا کہ یہ دستاویز جعلی ہے اور کمیشن نے اسے اپنی سرکاری ویب سائٹ پر بھی جھوٹا قرار دے رکھا ہے۔
🚫 FAKE NOTICE ALERT
The notification circulating regarding DAE’s equivalence to 14 years of education is fake. Please rely only on official announcements from HEC’s verified platforms. pic.twitter.com/EfjBivFl7v
— HEC Pakistan (@hecpkofficial) July 25, 2025
مزید تحقیق کے دوران یہ بھی سامنے آیا کہ اس جعلی نوٹیفکیشن میں درج ایچ ای سی کے رابطہ نمبرز اور ای میل ایڈریس یا تو ناقابلِ فہم ہیں یا واضح طور پر جان بوجھ کر مسخ کیے گئے ہیں۔
نتائج:۔ ایچ ای سی نے ڈپلومہ آف ایسوسی ایٹ انجینیئرنگ (ڈی اے ای) کو بیچلر ڈگری کے برابر قرار دینے کا نوٹیفکیشن جاری نہیں کیا، یہ دستاویز جعلی ہے۔
