سوشل میڈیا پر گردش کرنے والے ایک دعوے میں کہا گیا کہ اٹلی کی وزیر اعظم جارجیا میلونی نے میڈیا سے گفتگو کے دوران پاکستان کے وزیراعظم شہباز شریف کی تعریف کرتے ہوئے یہ ریمارکس دیے کہ اگر وہ ایک دہائی قبل عہدہ سنبھال لیتے تو پاکستان ایک سپر پاور بن سکتا تھا۔
سوشل میڈیا پر گردش کرنے والی اس ویڈیو میں اطالوی وزیراعظم جارجیا میلونی کو میڈیا سے گفتگو کرتے ہوئے دکھایا گیا ہے۔
میں نہیں جانتی عمران خان کون ہے؟
لیکن اتنا کہوں گی شہباز شریف جیسے قابل آدمی کو اگر دس سال پہلے وزیراعظم بنایا ہوتا تو یقیناً پاکستان اب تک سپر پاور ہوتا 😉😋 pic.twitter.com/1pzQh9PNPo— WAD (@ChaudharyWad) April 19, 2026
ویڈیو کے ساتھ کیپشن میں یہ دعویٰ کیا گیا کہ انہوں نے شہباز شریف کو قابل شخص قرار دیا اور کہاکہ اگر وہ پہلے وزیراعظم بنتے تو پاکستان سپر پاور بن سکتا تھا۔ ساتھ ہی یہ بھی کیا گیا کہ انہوں نے کہا ہے وہ عمران خان کو نہیں جانتیں۔
سوشل میڈیا صارفین بغیر تحقیق اس ویڈیو کو شیئر کررہے ہیں، اور مختلف تبصرے کیے جارہے ہیں۔
فیکٹ پلس نے اس حوالے سے تحقیق کی اور حقیقت جاننے کی کوشش کی تو معلوم ہوا کہ یہ دعویٰ درست نہیں۔
اصل آڈیو اور ترجمے سے معلوم ہوتا ہے کہ اطالوی وزیر اعظم ایک صحافی کے سوال کا جواب دے رہی تھیں، جو امریکی صدر ڈونلڈ ٹرمپ اور پوپ لیو سے متعلق تھا۔ گفتگو میں پاکستان یا اس کی سیاسی قیادت کا کوئی حوالہ موجود نہیں تھا۔
اسی پریس گفتگو کے مختلف حصے بین الاقوامی میڈیا اداروں نے بھی رپورٹ کیے، جن میں اس بات کی تصدیق ہوتی ہے کہ یہ بیان امریکی سیاست اور مذہبی معاملات سے متعلق تھا۔
تحقیق کے مطابق جارجیا میلونی سے منسوب پاکستانی سیاست سے متعلق یہ دعویٰ غلط اور گمراہ کن ہے، اور وائرل ویڈیو کو سیاق و سباق سے ہٹا کر پیش کیا گیا ہے۔
نتائج:۔ اطالوی وزیراعظم نے شہباز شریف اور عمران خان کے حوالے سے کوئی گفتگو نہیں کی۔
