سوشل میڈیا پر ایک خبر گردش کررہی ہے جس میں دعویٰ کیا گیا ہے کہ بی آئی ایس پی سے مستفید ہونے والے خاندانوں میں سے کسی نے اگر اپنی بچیوں کو ایچ پی وی ویکسین لگوانے سے انکار کیا تو ان کی امدادی رقم روک لی جائےگی۔
سوشل میڈیا صارفین اس خبر کو بغیر تحقیق شیئر کررہے ہیں، اور اس پر مختلف تبصرے بھی کیے جارہے ہیں، جبکہ بی آئی ایس پی سے مستفید ہونے والی خواتین کو اس خبر کے سامنے آنے پر پریشانی لاحق ہو رہی ہے۔
واضح رہے کہ سروائیکل کینسر سے بچاؤ کے لیے ویکسینیشن مہم کا آغاز 15 ستمبر سے ہو چکا ہے، تاہم اس ویکسین کے حوالے سے سوشل میڈیا پر مختلف غلط فہمیاں پھیلائی جارہی ہیں۔
ان غلط فہمیوں کے توڑ کے لیے آج وفاقی وزیر صحت ڈاکٹر مصطفیٰ کمال نے اپنی موجودگی میں اپنی بیٹی کو ایچ پی وی ویکسین لگوائی اور لوگوں کو یقین دلایا کہ یہ ویکسین محفوظ ہے۔
فیکٹ پلس نے اس حوالے سے تحقیق کی تو معلوم ہوا کہ بی آئی ایس پی نے ایسی کوئی ہدایات جاری نہیں کیں، یہ فیک نیوز ہے۔
دوسری جانب بینظیر انکم سپورٹ پروگرام (بی آئی ایس پی) نے بھی سوشل میڈیا پلیٹ فارمز پر وائرل جعلی نوٹس کے حوالے سے عوام کو خبردار کر دیا۔
بی آئی ایس پی عوامی انتباہ
ایک جعلی نوٹس کچھ دنوں سے سوشل میڈیا پر گردش کر رہا ہے، جس میں دعویٰ کیا گیا ہے کہ HPV ویکسین نہ لگوانے والوں کی ادائیگیاں روک دی جائیں گی۔یہ نوٹس بالکل جعلی ہے۔
بی آئی ایس پی کا HPV ویکسینیشن سے کوئی تعلق نہیں۔
کسی مستحق کی ادائیگی نہیں روکی جا… pic.twitter.com/FqitIxkDID— Benazir Income Support Programme (@bisp_pakistan) September 20, 2025
بی آئی ایس پی نے اپنے ایک بیان میں بتایا کہ ایک جعلی نوٹس کچھ دنوں سے سوشل میڈیا پلیٹ فارمز پر گردش کر رہا ہے جس میں دعویٰ کیا گیا ہے کہ ایچ پی وی ویکسین نہ لگوانے والوں کو ادائیگیاں روک دی جائیں گی۔
بیان میں کہا گیا کہ یہ نوٹس بالکل جعلی ہے، بی آئی ایس پی کا ایچ پی وی ویکسین سے کوئی تعلق نہیں اور کسی مستحق کی ادائیگی نہیں روکی جا رہی۔ عوام سے گزارش کی گئی کہ وہ اس جعلی نوٹس کو نظر انداز کر دیں اور غلط معلومات کے پھیلاؤ سے گریز کریں۔
نتائج:۔ اس خبر میں کوئی حقیقت نہیں کہ بچیوں کو ایچ پی وی ویکسین نہ لگوانے والے خاندانوں کی امداد روک دی جائےگی، یہ فیک نیوز ہے۔
