سوشل میڈیا پر ایک ویڈیو وائرل ہے جس میں ایک نوجوان ہتھوڑے سے سیکیوریٹی گارڈ پر وار کرتا دکھائی دیتا ہے، اور پھر گارڈ سے اسلحہ لے کر قریب کھڑے شہریوں سے کچھ رقم لوٹ کر فرار ہوجاتا ہے۔
اس ویڈیو کے حوالے سے سوشل میڈیا پر کہا جارہا تھا کہ یہ کراچی کے علاقے کھارادر میں قائم جماعت خانے کے باہر کے مناظر ہیں۔ اس کے ساتھ ساتھ یہ دعویٰ بھی کیا گیا کہ کراچی میں ہتھوڑا گینگ پھر سے سرگرم ہورہا ہے لہٰذا شہری احتیاط کریں۔
کھارادر جماعت خانہ پر موجود گارڈ کے سر پر ہتھوڑا مار کر اسکا پستول حاصل کیا پھر سر عام راہگیروں کو بھی لوٹ لیا گیا اب ڈاکووں کے ساتھ نیا ہھتوڑا گروپ بھی متحرک ہوگیا سندھ کی زیر سرپرستی کراچی جو پاکستانی معیشت کا حب ہے اب خوب ترقی کررہا ہے ۔۔۔۔۔ pic.twitter.com/0jrvUScXMo
— Muhammed Faisal (@Intl_Mediatior) May 5, 2024
فیکٹ پلس نے اس حوالے سے تحقیق کی اور جاننے کی کوشش کی کہ معاملے کی حقیقت کیا ہے۔
ڈسٹرکٹ سٹی پولیس نے ویڈیو کے حوالے سے تفتیش کرتے ہوئے اپنا وضاحتی بیان جاری کیا ہے۔
پولیس کے مطابق کھارادر جماعت خانے کے باہر ڈکیتی مزاحمت پر سیکیورٹی گارڈ کو ہتھوڑا مارنے کی خبر کو سیاق و سباق سے ہٹ کر پیش کیا جارہا ہے۔
پولیس نے بتایا کہ ڈسٹرکٹ سٹی تھانہ کھارادراولڈ سٹی ایریا میں اس قسم کی کوئی واردات رپورٹ نہیں ہوئی، ممکنہ طور پر کسی اور علاقے کے واقعہ یا پرانی کسی سی سی ٹی وی فوٹیج کو سیاق و سباق سے ہٹ کر کھارادر سے جوڑا جارہا ہے۔
