سوشل میڈیا پر ایک خبر گردش کررہی ہے کہ اسلام آباد میں موٹرسائیکل سوار پر تشدد کرنے والی خاتون پی ٹی آئی کے سیکریٹری جنرل سلمان اکرم راجا کی بہن ہیں۔
سوشل میڈیا صارفین اس پوسٹ کو بغیر تحقیق شیئر کررہے ہیں، اور تنقید بھی کی جارہی ہے، ایک سوشل میڈیا صارف نے لکھا کہ یہ خاندان ہی دو نمبر ہے، پی ٹی آئی کے سیکریٹری جنرل سلمان اکرم راجا کی بہن کی ایک غریب بائیکیا والے پر تشدد کی ویڈیو وائرل ہوئی ہے، دیکھیں کیسے گالیاں دے رہی ہیں، جیسا بھائی ویسی بہن۔
یہ خاندان ہی دو نمبر ہے۔۔
پی ٹی آئی کے سیکٹری جنرل سلمان اکرم راجہ کی بہن کا ایک غریب بائکیا والے پر تشدد کی ویڈیو وائرل۔
دیکھیں کیسے گالیاں دے رہی ہیں۔ جیسا بھائی ویسی بہن۔۔۔
شیر افضل مروت کی بددعا لگ گئی۔ pic.twitter.com/piQ4fTYV2g— Adv Madiha Shah (@MadihaShah_adv) February 17, 2025
واضح رہے کہ یہ گزشتہ ماہ کا واقعہ جب اسلام آباد میں ایک خاتون نے بائیکیا والے مرد کو تشدد کا نشانہ بنانے کے ساتھ ساتھ گالیاں بھی دی تھیں، اور یہ ویڈیو سوشل میڈیا پر وائرل ہوگئی تھی۔
ویڈیو سوشل میڈیا پر وائرل ہونے کے بعد پولیس نے خاتون کے خلاف مقدمہ بھی درج کیا تھا، اور پولیس کے مطابق کارروائی آگے بڑھ رہی ہے۔
فیکٹ پلس نے تحقیق کی اور حقائق جاننے کی کوشش کی تو معلوم ہوا کہ بائیکا والے مرد پر تشدد کرنے والی خاتون کا سلمان اکرم راجا سے کوئی تعلق نہیں۔
دوسری جانب پی ٹی آئی کے سیکریٹری جنرل سلمان اکرم راجا نے بھی نجی ٹی وی سے گفتگو کرتے ہوئے ان تمام دعوؤں کی تردید کرتے ہوئے کہاکہ ان کی ایک ہی بہن ہیں جو بیرون ملک مقیم ہیں۔
